ملا عبود الكرخى

بغداد مبنية بتمر فلـِّش وكُل خستاوي !!


الملا عبود الكرخي


بغداد مبنية بتمر ما ينگضي هذا العمر
يهواي دبرلي الامر التين اصبح لاوي

بغداد مبنية بلقم وترابها (سسي وبطم)
للطم على راسي لطم وانحر على المناوي

بغداد مبنية بزبد خلاني اتمرمر واكد
آني صرت مثل العبد والسيد (كريزاوي)

بغداد مبنية بخرگ وانهارها تجري عرگ
من هالامر گلبي احترگ صار الشغل بداوي

فلـِّش واكل تين ورطب واخلط التفاح وعنب
يا هلخلگ كلبي انعطب بالنار من (عتاوي)

فلـِّش وكل مرگة هوه ومن التمر سهمي النوه
جلدي على عظمي التوه من طب (ابو نجاوي)

بغداد مرشوشة بعسل واحجارها ثوم وبصل
والماي في دجلة وصل (هذا الگيش حلاوي)

آني صرت شايل حمل ومن اللبس حظي سمل
والتمر بالبصرة زبل لا سيما الخضراوي

(برحي والبريم ودگل) ما ينفعك شغل النخل
بابوجي من جلد الصخل والاجنبي فرنساوي

(بربن وزهدي واشرسي) طعمه ابد ما ينسي
الفلاح ابد ما ينكسي من (الحشف والحلاوي)

الاجنبي نهبني نهب وماطلني بالزور وكذب
فرهد الحنطة والشلب والتمن الخضراوي

فرهدلي صوفي والدهن وسهمي من الزرع التبن
خاف احچي ويضمني السجن أومي ومي صنطاوي

فلـِّش وكل خستاوي
** **
____________________________________
* ملا عبود الكرخي
* أشهر شاعر شعبي عراقي في مطلع القرن العشرين ومن أدباء العامية وصحفي وشخصية تراثية مشهورة .

15/02/2008

الرجوع الى الصفحة الرئيسية